|| प्रतिनिधी : अमोल बेडके ||
चिंचवड : चिंचवड पोलीस स्टेशनच्या तपास पथकाने वाहनचोरीच्या मालिकेचा यशस्वी छडा लावत एक विधिसंघर्षित बालक ताब्यात घेतला असून त्याच्याकडून चोरीच्या तब्बल ६ दुचाकी हस्तगत करण्यात आल्या आहेत. या कारवाईमुळे वाहनचोरीचे चार गुन्हे उघडकीस आले असून परिसरातील नागरिकांमध्ये समाधान व्यक्त होत आहे.
पोलीस स्टेशनमध्ये दाखल असलेल्या गुन्हा रजिस्टर क्रमांक १३६/२०२६, कलम BNS ३०३(२) अंतर्गत तपास सुरू असताना पोलिसांनी घटनास्थळ परिसरातील सीसीटीव्ही फुटेजची बारकाईने तपासणी केली. या तपासातून संबंधित विधिसंघर्षित बालकाने सदर वाहन चोरी केल्याचे स्पष्ट झाले. त्यानंतर पोलिसांनी तत्काळ कारवाई करत त्याला ताब्यात घेतले.
पुढील चौकशीदरम्यान संबंधित बालकाने एकूण ६ दुचाकी चोरी केल्याची कबुली दिली. त्यापैकी ४ दुचाकींवर चिंचवड पोलीस ठाण्यात आधीच चोरीचे गुन्हे दाखल असल्याचे निष्पन्न झाले आहे. उर्वरित २ दुचाकींविषयी इतर कोणत्या पोलीस ठाण्यात गुन्हे दाखल आहेत का, याबाबत सध्या तपास सुरू आहे.
या कारवाईमुळे चिंचवड पोलीस ठाण्यातील गुन्हा रजिस्टर क्रमांक ११९/२०२६, १२५/२०२६, १३५/२०२४ आणि १३६/२०२४ हे चार वाहनचोरीचे गुन्हे उघडकीस आले आहेत. पोलिसांनी हस्तगत केलेल्या दुचाकींची किंमतही लक्षणीय असल्याचे सांगितले जात आहे.
वरिष्ठ पोलीस निरीक्षक दत्ता चासकर यांच्या मार्गदर्शनाखाली तपास पथकाने ही उल्लेखनीय कारवाई केली. या यशस्वी कारवाईमुळे वाहनचोरीच्या घटनांवर आळा बसण्यास मदत होणार असल्याचा विश्वास पोलिसांनी व्यक्त केला आहे.
