चिंचवड : चिंचवड पोलीस ठाण्याचे वरिष्ठ पोलीस निरीक्षक दत्ता चासकर यांच्या मार्गदर्शनाखाली चिंचवड पोलिसांच्या सर्व्हलन्स पथकाने खुनाच्या प्रयत्नासह विविध गंभीर कलमांखाली दाखल असलेल्या गुन्ह्यात गेल्या नऊ महिन्यांपासून फरार असलेल्या पाहिजे आरोपीला सांगवी परिसरातून ताब्यात घेतले.
सचिन उर्फ सोल्जर जटाप्पा हेलवर (वय २७, रा. महबूब सुभानी दर्ग्यासमोर, मरिआई मंदिराजवळ, मोरया नगर, वेताळनगर, चिंचवड, पुणे) असे ताब्यात घेतलेल्या आरोपीचे नाव आहे.
चिंचवड पोलीस ठाण्यात गुन्हा रजिस्टर क्रमांक ५१७/२०२५ अन्वये भारतीय न्याय संहिता कलम १०९, ३०८(५), १८९, १८९(२), १९०, ३५२, ३५१(२) तसेच क्रिमिनल लॉ अमेंडमेंट अॅक्ट कलम ३(७) अन्वये गुन्हा दाखल आहे. सदर गुन्हा दाखल झाल्यापासून आरोपी पोलिसांना गुंगारा देत फरार होता.
आरोपीचा शोध घेण्यासाठी वरिष्ठ पोलीस निरीक्षक दत्ता चासकर यांनी सर्व्हलन्स पथकाला मार्गदर्शन करून आवश्यक सूचना दिल्या होत्या. त्यानुसार पथक आरोपीच्या मागावर होते. दरम्यान, सर्व्हलन्स पथकातील पोलीस हवालदार ९९६ लोहकरे व पोशी 3383 फरांदे यांना आरोपी सांगवी परिसरात येणार असल्याची गोपनीय माहिती मिळाली.
मिळालेल्या गोपनीय माहितीच्या आधारे सर्व्हलन्स पथकातील अंमलदारांनी सांगवी परिसरात सापळा रचून आरोपी सचिन उर्फ सोल्जर जटाप्पा हेलवर याला ताब्यात घेतले. त्यानंतर आरोपीविरुद्ध पुढील कायदेशीर कारवाई सुरू करण्यात आली आहे.
सदर आरोपीविरुद्ध यापूर्वीही चिंचवड पोलीस ठाण्यात विविध गुन्हे दाखल असल्याचे पोलिसांनी सांगितले. त्यामध्ये गुन्हा क्र. २१/२०२२, भादंवि कलम ३९५ सह इतर कलमे; गुन्हा क्र. ५०७/२०२३, भादंवि कलम ४२७, ५०४, ५०६, ३४ सह इतर कलमे; तसेच गुन्हा क्र. २४/२०२४, आर्म्स अॅक्ट कलम ४(२५) यांचा समावेश आहे.
ही उल्लेखनीय कारवाई चिंचवड पोलीस ठाण्याचे वरिष्ठ पोलीस निरीक्षक दत्ता चासकर यांच्या मार्गदर्शनाखाली सर्व्हलन्स पथकातील अधिकारी व अंमलदारांनी केली.
