पिंपरी-चिंचवड : चिंचवड पोलीस ठाण्याच्या सर्व्हलन्स पथकाने सहा महिन्यांपासून फरार असलेल्या मोक्का गुन्ह्यातील आरोपीला स्वारगेट परिसरातून सापळा रचून ताब्यात घेतले. आदित्य अशोक चव्हाण (रा. लोंढे चाळ, तलेरा हॉस्पिटलजवळ, चिंचवड, पुणे) असे ताब्यात घेतलेल्या आरोपीचे नाव आहे.
ही कारवाई चिंचवड पोलीस ठाण्याचे वरिष्ठ पोलीस निरीक्षक दत्ता चासकर यांच्या मार्गदर्शनाखाली करण्यात आली. दि. १० ऑगस्ट रोजी चिंचवड पोलीस ठाण्याचे सर्व्हलन्स पथक पाहिजे आरोपींचा शोध घेत असताना पोलीस हवालदार लोहकरे व फरांदे यांना खास बातमीदारामार्फत आदित्य चव्हाण हा स्वारगेट पोलीस ठाण्याच्या हद्दीत आल्याची माहिती मिळाली. त्यानंतर पथकाने सापळा रचून त्याला ताब्यात घेतले.
आदित्य चव्हाण याच्याविरुद्ध चिंचवड पोलीस ठाण्यात गुन्हा र. क्र. ६३/२०२६ नुसार भारतीय न्याय संहितेतील विविध कलमांसह महाराष्ट्र पोलीस अधिनियम, भारतीय शस्त्र अधिनियम तसेच क्रिमिनल अमेंडमेंट लॉ अंतर्गत गुन्हा दाखल आहे.
आरोपीचा पूर्वइतिहास : वाकड पोलीस ठाण्यात २०२२ मध्ये गंभीर स्वरूपाचा गुन्हा, तसेच चिंचवड पोलीस ठाण्यात २०२२ आणि २०२३ मध्ये मारहाण व जबरी चोरीसह विविध कलमांनुसार गुन्हे दाखल आहेत. आरोपीला ताब्यात घेतल्यानंतर त्याच्याविरुद्ध पुढील कायदेशीर कारवाई सुरू आहे.
सदरची कारवाई वरिष्ठ पोलीस निरीक्षक दत्ता चासकर यांच्या मार्गदर्शनाखाली सर्व्हलन्स पथकातील पोलीस हवालदार लोहकरे, पोलीस हवालदार फरांदे व पथकातील इतर अंमलदार यांनी केली
