पिंपरी-चिंचवड : प्रेमसंबंधात अडसर ठरत असलेल्या प्रेयसीच्या अवघ्या ६ वर्षांच्या मुलाची अत्यंत क्रूरपणे हत्या करून फरार झालेल्या आरोपीला दक्षिण महाळुंगे एमआयडीसी पोलिसांनी अथक पाठलाग करून अखेर अटक केली आहे. या प्रकरणाने परिसरात मोठी खळबळ उडाली आहे.
दक्षिण महाळुंगे एमआयडीसी पोलीस ठाण्यात दिनांक ८ एप्रिल २०२६ रोजी गुन्हा क्रमांक २७१/२०२६ अन्वये भारतीय न्याय संहितेच्या कलम १०३(१), २३८, ६१(२) आणि ३(५) अंतर्गत ६ वर्षीय मुलाच्या खुनाचा गुन्हा दाखल करण्यात आला होता.
पोलिसांनी दिलेल्या माहितीनुसार, आरोपी महिला बसरिन मेहबुब शेख (वय २७, रा. पुस, ता. अंबाजोगाई, जि. बीड) हिचे फरार आरोपी राम विनायक कजेवाड याच्याशी प्रेमसंबंध होते. दोघे मूळचे अंबाजोगाई येथील शेजारी असून महिला विवाहित आहे. तिला तीन अपत्ये आहेत. सुमारे चार महिन्यांपूर्वी ती तिच्या ६ वर्षीय मुलगा आवेज शेख याच्यासह कुरुळी (ता. खेड, जि. पुणे) येथे प्रियकरासोबत राहण्यासाठी आली होती.
दरम्यान, आवेज हा त्यांच्या प्रेमसंबंधात अडथळा ठरत असल्याने दोघांनी संगनमत करून ४ एप्रिल २०२६ रोजी रात्री साडेअकराच्या सुमारास मुलाची हत्या केल्याचे उघड झाले. आरोपींनी आवेजचे डोके बाथरूममधील पाण्याच्या बादलीत बुडवले तसेच त्याचे डोके भिंतीवर आणि जमिनीवर आपटून अत्यंत निर्दयीपणे खून केला.
घटनेनंतर गुन्हा लपवण्यासाठी मुलाचा मृत्यू हृदयविकाराच्या झटक्याने झाल्याचा बनाव करण्यात आला. मृतदेह इर्टिगा कारमधून धर्मापुरी, ता. परळी, जि. बीड येथे नेण्यात आला. मात्र मुलाचे नातेवाईक इसाक शेख यांना संशय आल्याने त्यांनी परळी ग्रामीण पोलिसांना माहिती दिली.
शवविच्छेदन अहवालात डोक्यावर व पाठीवर मारहाणीच्या जखमा स्पष्ट झाल्यानंतर आणि संशयास्पद हालचालींमुळे पोलिसांनी बसरिन शेख हिची सखोल चौकशी केली असता तिने गुन्ह्याची कबुली दिली. यापूर्वीच तिला अटक करण्यात आली होती.
दरम्यान, फरार आरोपी राम कजेवाड याचा तिरुपती (आंध्रप्रदेश) तसेच अंबाजोगाई परिसरात पाठलाग करून पोलिसांनी १७ एप्रिल २०२६ रोजी त्याला ताब्यात घेतले. न्यायालयासमोर हजर केले असता न्यायालयाने त्याला पाच दिवसांची पोलीस कोठडी सुनावली आहे.
ही कारवाई पोलीस आयुक्त श्री विनय कुमार चौबे, सहपोलीस आयुक्त डॉ. महावरकर, अप्पर पोलीस आयुक्त श्री सारंग अव्हाड, श्री बसवराज तेली, पोलीस उपआयुक्त परिमंडळ ४ श्रीमती श्वेता खेडकर आणि महाळुंगे विभागाचे सहायक पोलीस आयुक्त श्री सचिन कदम यांच्या मार्गदर्शनाखाली पार पडली. या कारवाईत वरिष्ठ पोलीस निरीक्षक श्री विजय ढमाळ, पोलीस निरीक्षक गुन्हे श्री अनिल देवडे, तपास पथकाचे सपोनि पुल्ली, सपोफौ चौधरी, तसेच अंमलदार विश्वास नाणेकर, किशोर सांगळे, युवराज बिराजदार, चेतन सावंत, राजेंद्र खेडकर, राजेंद्र गिरी, महेश गायकवाड, राजकुमार हणमंते, प्रशांत कसबे आणि शिवाजी मरकड यांनी उल्लेखनीय कामगिरी बजावली. सदर गुन्ह्याचा पुढील तपास पोलीस उपनिरीक्षक संतोष जायभाये हे करीत आहेत.
