पिंपरी-चिंचवड : गुन्हे शाखा युनिट ०१ ने पेट्रोलिंगदरम्यान शिताफीने कारवाई करत निगडी परिसरातून बेकायदा धारदार लोखंडी पालघनसारखे हत्यार बाळगणाऱ्या एका तरुणाला ताब्यात घेतले आहे. या प्रकरणी आरोपीविरुद्ध भारतीय शस्त्र अधिनियम १९५९ तसेच महाराष्ट्र पोलीस अधिनियम १९५१ अंतर्गत गुन्हा दाखल करण्यात आला आहे.
दि. १९ एप्रिल २०२६ रोजी गुन्हे शाखा युनिट ०१ चे अंमलदार हद्दीत पेट्रोलिंग करीत असताना पोलीस हवालदार विजय शेळकंदे यांना गोपनीय बातमीदारामार्फत माहिती मिळाली. त्यानुसार राजनगर ओटास्किम, निगडी येथील महानगरपालिकेच्या सुलभ शौचालयाच्या पाठीमागे, स्पाईन रोडलगतच्या सर्व्हिस रोडवर एक तरुण संशयास्पदरीत्या धारदार हत्यारासह फिरत असल्याचे समोर आले.
मिळालेल्या माहितीच्या आधारे पोलिसांनी तत्काळ सापळा रचून प्रणय बाबासाहेब बनकर (वय १९ वर्षे, रा. गुरुदत्त हौसिंग सोसायटी, एफ-४, रूम नं. ४१५, ओटास्किम, निगडी, पुणे) याला ताब्यात घेतले.
तपासात आरोपीकडे बेकायदा धारदार लोखंडी पालघनसारखे हत्यार आढळून आले. विशेष म्हणजे, मा. पोलीस सह आयुक्त, पिंपरी-चिंचवड यांनी महाराष्ट्र पोलीस अधिनियम कलम ३७ (१) (३) अंतर्गत जारी केलेल्या प्रतिबंधात्मक आदेशानुसार दि. १५ एप्रिल ते २८ एप्रिल २०२६ या कालावधीत शस्त्रे व हत्यारे बाळगण्यास मनाई करण्यात आली होती. असे असतानाही आरोपीने आदेशाचे उल्लंघन करून हत्यार बाळगले होते.
सदरची कारवाई वरिष्ठ पोलीस निरीक्षक नरेंद्र ठाकरे यांच्या मार्गदर्शनाखाली पोलीस हवालदार जयवंत राऊत, विजय शेळकंदे तसेच पोलीस शिपाई केशव चेपटे आणि सोहेल चिखलकर यांनी शिताफीने पार पाडली. आरोपीविरुद्ध भारतीय शस्त्र अधिनियम १९५९ चे कलम ४ (२५) तसेच महाराष्ट्र पोलीस अधिनियम १९५१ चे कलम ३७ (१) (३) सह १३५ प्रमाणे गुन्हा दाखल करण्यात आला असून पुढील कायदेशीर कारवाईसाठी निगडी पोलीस स्टेशन येथे वैद्यकीय तपासणीनंतर हजर करण्यात आले आहे.
