चिंचवड : आषाढी एकादशीचे औचित्य साधत श्री जैन विद्या प्रसारक मंडळ संचलित श्री गुरु गणेश बालक मंदिर, चिंचवड व सेठ श्री रतिलाल विठ्ठलदास गोसलिया शिशुविहार येथे पारंपरिक वारकरी संस्कृतीचे दर्शन घडविणारा पालखी सोहळा मोठ्या उत्साहात आणि भक्तिमय वातावरणात संपन्न झाला. विद्यार्थ्यांच्या उत्स्फूर्त सहभागामुळे संपूर्ण शाळा परिसर “ज्ञानोबा-तुकाराम” यांच्या जयघोषाने दुमदुमून गेला.
कार्यक्रमाची सुरुवात शालेय शिक्षण समितीचे अध्यक्ष प्राचार्य मा. श्री. अनिलकुमारजी मोतीलालजी कांकरिया यांच्या हस्ते पालखी पूजनाने झाली. यावेळी संस्थेचे ऑनररी जनरल सेक्रेटरी मा. ॲड. श्री. राजेंद्रकुमारजी शंकरलालजी मुथा यांनी विद्यार्थ्यांना आषाढी एकादशीच्या शुभेच्छा देत वारकरी संप्रदायातील श्रद्धा, भक्ती, संस्कार आणि समतेचा संदेश आपल्या जीवनात अंगीकारण्याचे आवाहन केले.
सोहळ्यात विद्यार्थ्यांनी वारकरी संप्रदायाची पारंपरिक वेशभूषा परिधान करून कार्यक्रमाची शोभा वाढवली. भगवान विठ्ठल, माता रुक्मिणी, संत ज्ञानेश्वर महाराज, संत तुकाराम महाराज तसेच विविध संतांच्या आकर्षक वेशभूषांमधून विद्यार्थ्यांनी संतपरंपरेचे दर्शन घडविले. विद्यार्थ्यांनी सजविलेली पालखी, टाळ, मृदंग, भगवे पताके आणि वारकरी दिंडीने उपस्थितांचे विशेष लक्ष वेधून घेतले.
सोहळ्याचे प्रमुख आकर्षण ठरले ते पारंपरिक पद्धतीने साकारण्यात आलेले भव्य रिंगण. टाळ-मृदंगाच्या गजरात, अभंगांच्या सुरावटीत आणि “ज्ञानोबा-तुकाराम”च्या जयघोषात विद्यार्थ्यांनी उत्साहाने पालखी नाचवत वारकरी परंपरेचा जिवंत अनुभव साकारला. या भक्तिमय वातावरणामुळे उपस्थित पालक, शिक्षक व विद्यार्थ्यांनी या अनोख्या सोहळ्याचा मनापासून आनंद लुटला.
या कार्यक्रमाचे नियोजन व मार्गदर्शन मुख्याध्यापिका सौ. लता पाटील यांच्या नेतृत्वाखाली शिक्षक व शिक्षकेतर कर्मचाऱ्यांनी उत्कृष्टरीत्या केले. विद्यार्थ्यांमध्ये भारतीय संस्कृती, संतपरंपरा, भक्तीभाव आणि सामाजिक एकात्मतेचे संस्कार रुजविण्याच्या उद्देशाने आयोजित करण्यात आलेला हा पालखी सोहळा अत्यंत यशस्वी ठरला.
या प्रसंगी शाळेतील सर्व शिक्षक, शिक्षकेतर कर्मचारी, विद्यार्थी व पालक मोठ्या संख्येने उपस्थित होते. विद्यार्थ्यांच्या उत्स्फूर्त सहभागामुळे हा पालखी सोहळा आनंददायी, संस्कारमय आणि अविस्मरणीय ठरत उपस्थितांच्या मनात भक्तीभावाची अविस्मरणीय छाप उमटवून गेला.
