पिंपरी-चिंचवड : श्री जैन विद्या प्रसारक मंडळाचे माजी मानद सचिव तसेच पिंपरी-चिंचवडचे पहिले स्काऊट कमिशनर स्व. श्रीमान शंकरलालजी जोगीदासजी मुथा यांच्या १७ व्या पुण्यस्मरणानिमित्त श्री फत्तेचंद जैन विद्यालय व ज्युनिअर कॉलेजमध्ये विविध शैक्षणिक, सामाजिक व सांस्कृतिक उपक्रमांचे आयोजन करण्यात आले. यावेळी विद्यालयाच्या स्काऊट पथकाने स्व. मुथा यांच्या प्रतिमेस मानवंदना देऊन कार्यक्रमाची सुरुवात करण्यात आली.
कार्यक्रमाच्या प्रारंभी स्व. मुथा यांच्या प्रतिमेचे पूजन करून नवकार महामंत्र व ‘ॐ नमः शिवाय’ जप करण्यात आला. संस्थेचे ऑनररी जनरल सेक्रेटरी ॲड. राजेंद्रकुमार शंकरलाल मुथा, सहाय्यक सेक्रेटरी प्रा. अनिलकुमार मोतीलाल कांकरिया, कार्यकारिणी सदस्य प्रकाशचंद बंब व जयकुमार धोका यांच्या हस्ते विविध स्पर्धा दालनांचे उद्घाटन करण्यात आले.
प्राचार्य विक्रम काळे यांनी स्व. मुथा यांच्या शैक्षणिक कार्याचा, दूरदृष्टीचा आणि विद्यार्थ्यांच्या सर्वांगीण विकासासाठी त्यांनी केलेल्या योगदानाचा आढावा घेतला. उपमुख्याध्यापक हितेंद्र लोखंडे यांनी त्यांच्या सामाजिक, धार्मिक आणि सेवाभावी कार्याची माहिती देत विद्यार्थ्यांनी त्यांच्या विचारांचा आदर्श घ्यावा, असे आवाहन केले.
यावेळी ‘निरोगी आरोग्याची गुरुकिल्ली’ या विषयावर डॉ. सचिन लवणे (व्यवस्थापक, कै. प्रभाकर कुटे रुग्णालय, आकुर्डी) यांचे मार्गदर्शनपर व्याख्यान झाले. तसेच पिंपरी-चिंचवड सायन्स पार्क व आयसर यांच्या संयुक्त विद्यमाने सुरू असलेल्या ‘कल्पना’ उपक्रमांतर्गत प्रा. घनश्याम साके यांनी विज्ञान प्रयोगांचे प्रात्यक्षिक सादर करून विद्यार्थ्यांमध्ये वैज्ञानिक दृष्टिकोन विकसित करण्याचा प्रयत्न केला.
विद्यार्थ्यांसाठी हिमोग्लोबिन व नेत्र तपासणी शिबिर, ऑरगंडी फुले व कागदी पिशव्या तयार करण्याची कार्यशाळा, चित्रकला, हस्ताक्षर व काव्यलेखन स्पर्धा तसेच पालकांसाठी पारंपरिक थाळी पाककला व पूजा थाळी सजावट स्पर्धांचे आयोजन करण्यात आले. समाजऋणाची जाणीव ठेवत तालेरा रुग्णालयातील रुग्णांना फळवाटप करण्यात आले, तर पर्यावरण संवर्धनाचा संदेश देण्यासाठी वृक्षारोपण करण्यात आले. स्व. मुथा यांच्या कार्यावर आधारित माहितीपर पीपीटीही सादर करण्यात आली.
कार्यक्रमाचे नियोजन पर्यवेक्षक संजीव वाखारे, पर्यवेक्षिका मनीषा कलशेट्टी व शिक्षक प्रतिनिधी व्ही. एस. पाटील यांनी केले. राजेंद्र पितळीया यांनी आभार मानले, तर धनश्री कांबळे यांनी सूत्रसंचालन केले. स्व. शंकरलालजी मुथा यांच्या आदर्श विचारांचा व समाजसेवेचा वारसा जपण्याचा संकल्प व्यक्त करत कार्यक्रमाची सांगता झाली.
