🪔 श्री फत्तेचंद जैन विद्यालयात दीप पूजन व पारंपरिक-आधुनिक दिव्यांचे भव्य प्रदर्शन. 🪔
नवकार मंत्र, दीपआरती आणि भारतीय संस्कृतीचे दर्शन घडवणारा कार्यक्रम विद्यार्थ्यांसह उत्साहात साजरा –

चिंचवड : प्रतिनिधी : ( अमोल बेडके ) श्री फत्तेचंद जैन विद्यालय व ज्युनियर कॉलेज येथे गुरुवार, दिनांक २४ जुलै २०२५ रोजी दीप अमावस्येच्या निमित्ताने “दीप पूजन” व पारंपरिक आणि आधुनिक दिव्यांचे प्रदर्शन मोठ्या उत्साहात पार पडले. कार्यक्रमाची सुरुवात नवकार महामंत्र पठण, श्लोक व दीपप्रज्वलनाने करण्यात आली. पवित्र वातावरणात दिव्यांची आरती देखील करण्यात आली.

या विशेष कार्यक्रमासाठी संस्थेचे ऑनररी जनरल सेक्रेटरी श्री राजेंद्रकुमारजी शंकरलालजी मुथा आणि सहाय्यक सेक्रेटरी श्री अनिलकुमारजी मोतीलालजी कांकरिया यांनी शुभेच्छा दिल्या.

🪔 “चंद्र प्रकाशाची शीतल छाया,                                                    सूर्य किरणांची उर्जित माया 

       हृदयात पावित्र्याचे दैवत असतं,                                                दिवा नावातच सौंदर्य फुलत.” 🪔

अशा ओळींमधून दीपाचा अर्थ अधोरेखित करत विद्यार्थ्यांनी दीप पूजनात भाग घेतला.

भारतीय संस्कृतीचे जतन आणि विद्यार्थ्यांमध्ये तिचे महत्त्व रुजवण्यासाठी विद्यालयात पारंपरिक व आधुनिक दिव्यांचे सुंदर प्रदर्शन भरवण्यात आले होते. यामध्ये निरांजन, कंदील, नंदादीप, मशाल, दिवटी, कणकेचे दिवे, तुपाचे दिवे, विजेवर चालणारे दिवे, आकाश कंदील, झुंबर यांचा समावेश होता.

या प्रदर्शनाचे संयोजन शिक्षिका स्वाती खोडदे, वैशाली काळे व नेहा यादव यांनी केले होते. लहान बालकांच्या प्रतिनिधित्वातून दीप पूजनाचे सादरीकरण करण्यात आले.

कार्यक्रमाच्या प्रास्ताविकामध्ये पर्यवेक्षक श्री संजय वाखारे यांनी दीप अमावस्या साजरी करण्यामागील सांस्कृतिक आणि अध्यात्मिक कारण स्पष्ट केले. सौ. स्मिता सोनवणे यांनी दीप पूजनाचे शास्त्रीय महत्त्व विद्यार्थ्यांना समजावून सांगितले.

विद्यालयाच्या प्राचार्या सौ. सुनीता नवले यांनी दीप अमावस्येच्या शुभेच्छा देत श्रावण महिन्यातील आहाराचे शास्त्रीय महत्त्व विद्यार्थ्यांपर्यंत पोहोचवले. उपमुख्याध्यापिका सौ. मनीषा जैन आणि पर्यवेक्षक श्री राजेंद्र पितळीया यांनी कार्यक्रमासाठी शुभेच्छा दिल्या.

कार्यक्रमाचे सूत्रसंचालन सौ. वंदना पाटील यांनी तर आभार प्रदर्शन पर्यवेक्षिका श्रीमती मनीषा कलशेट्टी यांनी केले.