मोहोळ प्रतिनिधी | ज्योतीराम कांबळे
मोहोळ पोलीस ठाण्यात दाखल असलेल्या अनुसूचित जातीतील विवाहित महिलेवरील गंभीर लैंगिक अत्याचार प्रकरणात अद्याप आरोपींना अटक करण्यात आलेली नसल्याने संतापाची लाट उसळली आहे. या पार्श्वभूमीवर राष्ट्रीय चर्मकार महासंघाने थेट पोलीस अधीक्षकांना निवेदन देत आरोपींना तात्काळ अटक करून पीडित कुटुंबाला संरक्षण देण्याची जोरदार मागणी केली आहे.
मोहोळ पोलीस ठाण्यात गुन्हा क्रमांक 420/2026 अंतर्गत दाखल या प्रकरणात बीएनएस तसेच अनुसूचित जाती-जमाती अत्याचार प्रतिबंधक कायद्यान्वये गंभीर गुन्हे नोंद असूनही आरोपी अद्याप मोकाट फिरत असल्याचा आरोप निवेदनातून करण्यात आला आहे. त्यामुळे पीडित कुटुंब भयभीत असून समाजात संतापाचे वातावरण निर्माण झाले आहे.
राष्ट्रीय चर्मकार महासंघाने आपल्या निवेदनात म्हटले आहे की, अनुसूचित समाजातील महिलांवरील अत्याचाराच्या घटनांमध्ये वाढ होत असताना पोलिसांकडून कठोर आणि तातडीची कारवाई अपेक्षित आहे. मात्र या प्रकरणात आरोपींना अभय मिळत असल्याचा संशय निर्माण होत आहे. आरोपींकडून पुरावे नष्ट करणे, साक्षीदारांवर दबाव टाकणे तसेच पीडित कुटुंबाला धमकावण्याची शक्यता देखील संघटनेने व्यक्त केली आहे.
या निवेदनात आरोपींना तात्काळ अटक, पीडित कुटुंबाला पोलीस संरक्षण, निष्पक्ष चौकशी, वरिष्ठ अधिकाऱ्यांच्या देखरेखीखाली तपास आणि दोषींवर कठोर कारवाई अशा सात ठोस मागण्या करण्यात आल्या आहेत.
दरम्यान, अनुसूचित जाती-जमाती अत्याचार प्रतिबंधक कायद्यानुसार गुन्हा दाखल होऊनही तपासाची गती मंद असल्याची चर्चा सुरू झाली असून मोहोळ पोलिसांच्या भूमिकेवर प्रश्नचिन्ह निर्माण झाले आहे. या पार्श्वभूमीवर सामाजिक संघटनांनी तीव्र नाराजी व्यक्त केली आहे. “पीडितेला न्याय द्या, आरोपींना तात्काळ बेड्या ठोका,” अशी आक्रमक भूमिका राष्ट्रीय चर्मकार महासंघाने घेतली असून, लवकर कारवाई न झाल्यास तीव्र आंदोलन छेडण्याचा इशाराही देण्यात आला आहे.
यावेळी निवेदन देण्यासाठी राष्ट्रीय चर्मकार महासंघाचे पश्चिम महाराष्ट्र अध्यक्ष संजय शिंदे, शावरप्पा वाघमारे, परमेश्वर काळे, बाळासाहेब आळसंदे, शोभा धुळराव, कविता कोडवान, प्रविण लांबतूरे, गोपाळ सौदागर, आशा शेरखाने, इंदू कांबळे, सुर्यकांत व्हनकडे यांच्यासह समाजबांधव मोठ्या संख्येने उपस्थित होते.
