पुणे : शेषात्मज गणेश जयंतीनिमित्त श्रीमंत दगडूशेठ हलवाई सार्वजनिक गणपती ट्रस्ट आणि सुवर्णयुग तरुण मंडळाच्या वतीने श्रीमंत दगडूशेठ हलवाई गणपती मंदिरात शेषनागाच्या विविधरंगी पुष्पप्रतिमांची भव्य सजावट करण्यात आली. शेषनागाच्या प्रतिकृतींमध्ये विराजमान झालेल्या गणरायाच्या चांदीच्या मूर्तीचे विलोभनीय दर्शन घेण्यासाठी गुरुवारी सकाळपासून भाविकांनी मोठी गर्दी केली.
गाणपत्य संप्रदायात महत्त्वाचे स्थान असलेल्या शेषात्मज गणेश जयंतीनिमित्त मंदिरात विविध धार्मिक कार्यक्रमांचे आयोजन करण्यात आले. पहाटे ३ वाजता ब्रह्मवृंदांच्या उपस्थितीत ब्रह्मणस्पती सूक्त अभिषेक संपन्न झाला. त्यानंतर पहाटे ४ वाजता विदुषी शैला दातार यांनी स्वराभिषेकातून गणरायाच्या चरणी स्वरसेवा अर्पण केली. याशिवाय दिवसभर अभिषेक आणि गणेश यागाचेही आयोजन करण्यात आले.
श्रीमंत दगडूशेठ हलवाई सार्वजनिक गणपती ट्रस्टचे अध्यक्ष सुनील रासने यांनी शेषात्मज अवताराचे महत्त्व सांगताना म्हटले की, गाणपत्य संप्रदायात भाद्रपद आणि माघ महिन्यांप्रमाणेच ज्येष्ठ शुद्ध चतुर्थीचा श्रीशेषात्मज जन्मोत्सव अत्यंत महत्त्वाचा मानला जातो. पौराणिक कथेनुसार, भगवान शेषांच्या ध्यानातून ज्येष्ठ शुद्ध चतुर्थीला भगवान गणेश श्रीशेषात्मज रूपात प्रकट झाले. पुढे याच अवताराने गजासुराचा वध करून धर्माचे रक्षण केले. त्यामुळे श्रीशेषात्मज अवताराला ‘श्रीमूषकग’ हे नावही प्राप्त झाले आहे.
शेषनागाच्या प्रतिकृती, रंगीबेरंगी फुलांची मनमोहक आरास आणि धार्मिक वातावरणामुळे मंदिर परिसर भक्तिमय झाला होता. गणरायाच्या या अनोख्या सजावटीने भाविकांचे विशेष आकर्षण ठरले.
