|| प्रतिनिधी : प्रशांत पटाडे ||
पिंपरी चिंचवड : पिंपरी चिंचवड महानगरपालिकेच्या ‘ब’ क्षेत्रीय कार्यालयांतर्गत प्रभाग क्रमांक १७ मधील वाल्हेकरवाडी येथे आज दि. २३ एप्रिल २०२६ रोजी अंदाजे १,१६४ चौ. मीटर क्षेत्रफळाच्या अनधिकृत बांधकामावर मोठी निष्कासन कारवाई करण्यात आली. यापूर्वीही शहरातील विविध भागांत अनधिकृत बांधकामांवर अनेक कारवाया करण्यात आल्या असल्या, तरी प्रभाग १७ मधील ही आतापर्यंतची पहिली मोठी आणि महत्त्वाची कारवाई मानली जात आहे.
मा. आयुक्त श्री. विजय सूर्यवंशी यांच्या आदेशान्वये आणि मा. अतिरिक्त आयुक्त श्रीम. तृप्ती सांडभोर यांच्या मार्गदर्शनाखाली ही मोहीम राबविण्यात आली. ‘ब’ क्षेत्रीय अधिकारी श्री. राजाराम सरगर यांच्या अधिपत्याखाली झालेल्या या कारवाईत बीट निरीक्षक, एमएसएफ जवान, पोलीस कर्मचारी, मनपा मजूर आणि ठेकेदार मजूर यांचा मोठा सहभाग होता. जेसीबी ब्रेकर आणि ट्रॅक्टर ब्रेकरच्या साहाय्याने सदर बांधकाम हटविण्यात आले.
शहरातील इतर प्रभागांमध्येही सध्या अनधिकृत बांधकामांविरोधात जोरदार कारवाई सुरू असून, त्याच धर्तीवर आता प्रभाग १७ मध्येही पुढील काही दिवसांत आणखी मोठ्या प्रमाणात निष्कासन मोहिम राबविण्याची तयारी सुरू झाल्याची माहिती समोर येत आहे. एकच कारवाई करून प्रशासन शांत बसणार नसून, प्रभागातील इतर अनधिकृत बांधकामांवरही लक्ष केंद्रीत करण्यात आले आहे.
प्रभाग १७ मध्ये सुरू झालेली ही मोहीम आगामी काळात अधिक वेगाने पुढे नेली जाणार असून, मनपाने संबंधित विभागांना यासाठी सज्ज राहण्याच्या सूचना दिल्याची चर्चा आहे. त्यामुळे वाल्हेकरवाडी आणि परिसरातील अनधिकृत बांधकाम धारकांमध्ये सध्या चिंतेचे वातावरण निर्माण झाले आहे.
