|| प्रतिनिधी : अमोल बेडके ||
चिंचवड : पिंपरी-चिंचवड शहरातून वाहणाऱ्या पवना नदीचे पात्र दिवसेंदिवस अरुंद होत असल्याचे चिंताजनक चित्र समोर येत आहे. चिंचवड येथील बिर्ला रुग्णालयालगतच्या नदीकाठावर मोठ्या प्रमाणात मातीचा भराव टाकून अतिक्रमण सुरू असल्याचा आरोप स्थानिकांकडून केला जात आहे. मैदान उभारणीच्या नावाखाली नदीचे नैसर्गिक अस्तित्वच धोक्यात येत असल्याची भावना व्यक्त होत आहे.
स्थानिकांच्या म्हणण्यानुसार, नदीकाठावरील झाडे तोडण्यासोबतच काही झाडांच्या बुंध्यांवर माती टाकून ती पूर्णपणे गाडली जात आहेत. परिणामी, नदीकाठावरील जैवविविधता नष्ट होण्याचा धोका निर्माण झाला आहे. पाण्याचा नैसर्गिक प्रवाह अडवल्याने भविष्यात पूरस्थिती अधिक गंभीर होण्याची भीतीही व्यक्त केली जात आहे.
या सर्व प्रकाराकडे पिंपरी-चिंचवड महानगरपालिकेच्या पर्यावरण विभाग व संबंधित क्षेत्रीय कार्यालयाचे दुर्लक्ष होत असल्याचा आरोप नागरिकांकडून करण्यात येत आहे. नदी संवर्धनासाठी मोठ्या प्रमाणावर योजना आखल्या जात असताना प्रत्यक्षात मात्र नदीपात्रातच अतिक्रमण होत असल्याने प्रशासनाच्या भूमिकेवर प्रश्नचिन्ह उपस्थित होत आहे.
नागरिकांनी या प्रकाराची तातडीने दखल घेऊन संबंधितांवर कठोर कारवाई करण्याची मागणी केली आहे. तसेच, पवना नदीचे मूळ स्वरूप जपण्यासाठी आणि पर्यावरण संतुलन राखण्यासाठी ठोस उपाययोजना राबविण्याची गरज व्यक्त होत आहे.
