📰 निगडी ते आकुर्डी सेवा रस्त्यावरील मृत्यूच्या खड्ड्यांविरोधात घंटा नाद आंदोलन

|| प्रतिनिधी :  अमोल बेडके ||

पिंपरी चिंचवड : निगडी लोकमान्य टिळक चौक ते आकुर्डी श्री खंडोबा मंदिर चौक या सेवा रस्त्यावर मोठमोठाले जीवघेणे खड्डे पडले असून, या मार्गावरून प्रवास करणाऱ्या नागरिकांचे जीव धोक्यात आले आहेत. नागरिकांना अक्षरशः जीव मुठीत धरून वाहन चालवावे लागत आहे.

या गंभीर प्रश्नाकडे प्रशासनाचे लक्ष वेधण्यासाठी सुमित जाधव सोशल फाउंडेशनच्या अध्यक्षा दीपा काटे यांच्या नेतृत्वाखाली बजाज ऑटो गेटजवळ तीव्र घंटा नाद आंदोलन करण्यात आले.

सदर आंदोलनात स्थानिक नागरिकांनी मोठ्या प्रमाणात सहभाग घेतला असून, रस्त्याच्या दुरवस्थेबद्दल संताप व्यक्त केला. हे आंदोलन पिंपरी चिंचवड शहरात लक्षवेधी ठरले आहे.

यावेळी स्थापत्य विभागाचे कार्यकारी अभियंता श्री. ननावरे यांना निवेदन देताना आंदोलनकर्त्यांनी ठामपणे सांगितले की,
“आम्हाला आश्वासन नकोत, बदल हवा! दोन दिवसात रस्ता दुरुस्त झाला पाहिजे. नागरिकांचा जीव घेणाऱ्या खड्ड्यांकडे दुर्लक्ष करणाऱ्या प्रशासनाचे करायचे तरी काय?”

यावेळी आंदोलकांनी जोरदार घोषणा दिल्या –
“असल्या प्रशासनाचं करायचं काय ! खाली डोकं वर पाय” ,
“आश्वासन नको बदल हवा
“दोन दिवसात रस्ता हवा!”

असे नारे देत संतप्त नागरिकांनी तीव्र रोष व्यक्त केला.