📰 शिक्षकांच्या मानसिक छळाला कंटाळून कृषी महाविद्यालयातील विद्यार्थ्याचा आत्महत्येचा प्रयत्न
केवळरामजी हरडे कृषी महाविद्यालयात विद्यार्थ्यांवर दबाव, पैशांची मागणी, विद्यार्थिनींची छेडछाड; संतप्त पालकांकडून शिक्षकांवर कठोर कारवाईची मागणी

|| प्रतिनिधी – प्रशांत शाहा ||

गडचिरोली  : चामोर्शी शहरातील केवळरामजी हरडे कृषी महाविद्यालयात शिक्षण घेणाऱ्या एका तरुण विद्यार्थ्याने शिक्षकांकडून होणाऱ्या मानसिक छळाला कंटाळून आत्महत्या करण्याचा धक्कादायक प्रयत्न केला. या प्रकारामुळे महाविद्यालयीन वातावरणात प्रचंड खळबळ उडाली आहे.

अनिकेत गजेंद्र सोनटक्के (वय २४, रा. आरमोरी) असे आत्महत्या करण्याचा प्रयत्न करणाऱ्या विद्यार्थ्याचे नाव असून, तो पदवी पूर्ण करण्यासाठी या खाजगी कृषी महाविद्यालयात शिक्षण घेत आहे. या प्रकरणात तुषार भांडारकर व पवन दुधबावरे या दोन शिक्षकांचे नाव समोर आले असून, त्यांनी अनिकेत याला सातत्याने मानसिक त्रास दिल्याचा आरोप केला जात आहे.

महाविद्यालयीन विद्यार्थ्यांनी दिलेल्या माहितीनुसार, या शिक्षकांकडून विद्यार्थ्यांवर सतत अभ्यासासंबंधी अमानवी दबाव आणणे, “तुम्हाला पास व्हायचे असेल तर पैसे द्या, नाहीतर नापास करू”, “पदवी पूर्ण करण्यासाठी १० वर्षे लावू”, “सगळे आमच्याच हातात आहे”, अशा स्वरूपाच्या धमक्या देण्यात येत होत्या. केवळ अनिकेतच नव्हे, तर अनेक विद्यार्थ्यांना या छळाला सामोरे जावे लागत होते.

याचबरोबर, या शिक्षकांकडून विद्यार्थिनींना वाईट नजरेने पाहणे, छेडछाड करणे, आणि त्यांचा मानसिक छळ करणे असे प्रकारही घडत असल्याची गंभीर माहिती समोर आली आहे. मुलींनी अब्रूच्या भीतीने तक्रार न करण्याची मानसिकता धरल्यामुळे आरोपी शिक्षकांचे मनोधैर्य दिवसेंदिवस वाढत गेले.

सततच्या अपमान आणि छळामुळे नैराश्यात गेलेल्या अनिकेतने आत्महत्या करण्याचा निर्णय घेतला. आत्महत्या करण्यापूर्वी त्याने एक चिठ्ठी लिहून आपल्याला होणाऱ्या त्रासाबाबत सविस्तर खुलासा केला होता. परंतु काही विद्यार्थ्यांनी वेळेत ही बाब लक्षात घेऊन तात्काळ हस्तक्षेप केला आणि अनिकेतचा जीव वाचवण्यात यश आले.

या घटनेनंतर विद्यार्थी आणि पालकांमध्ये संतापाची लाट उसळली आहे. “एका चुकीच्या शिक्षकांमुळे आमच्या मुलांचे आयुष्य उदध्वस्त होत आहे, याला जबाबदार कोण?”, असा सवाल पालकांनी महाविद्यालय प्रशासनाला विचारला आहे.

विद्यार्थ्यांच्या सुरक्षिततेसाठी आणि शैक्षणिक वातावरण शुद्ध राहण्यासाठी तात्काळ या आरोपी शिक्षकांवर कडक कारवाई करण्याची, तसेच विद्यार्थिनींवर होणारा अन्याय थांबवण्याची मागणी करण्यात येत आहे.

यासंदर्भात महाविद्यालय प्रशासनाने अद्याप कोणतेही ठोस पाऊल उचलले नसल्याचे समजते. तथापि, या प्रकरणाची गांभीर्याने दखल घेऊन तातडीने चौकशी करण्यात यावी आणि संबंधित शिक्षकांवर कायदेशीर कारवाई व्हावी, अशी जोरदार मागणी पालकवर्ग, विद्यार्थी संघटना आणि सामाजिक कार्यकर्ते करीत आहेत.