विकास नगर : अचानक आलेल्या वादळी पावसामुळे विकास नगर परिसरात मोठ्या प्रमाणात नुकसान झाले. नेटके कॉर्नर, मुकाई मंदिर व श्रीराम चौक परिसरात अनेक झाडे कोसळल्याने वाहतूक पूर्णपणे विस्कळीत झाली होती. काही ठिकाणी रस्त्यावर पाणी साचल्यामुळे नागरिकांना मोठ्या अडचणींचा सामना करावा लागला. तर काही दुकानांमध्ये पाणी शिरले आणि काही वाहनेही पाण्याखाली गेल्याच्या घटना घडल्या.
घटनेची माहिती मिळताच नगरसेवक निलेश तरस यांनी तातडीने घटनास्थळी धाव घेतली. त्यांनी परिस्थितीचा आढावा घेत महानगरपालिकेच्या संबंधित विभागाला त्वरित पाचारण केले. महानगरपालिकेच्या कर्मचाऱ्यांच्या मदतीने रस्त्यावर पडलेली धोकादायक झाडे व फांद्या बाजूला करण्यात आल्या, तसेच पाण्याचा निचरा करून वाहतूक सुरळीत करण्यात आली.
या जलद आणि तत्पर कार्यवाहीमुळे परिसरातील नागरिकांनी समाधान व्यक्त करत नगरसेवकांचे आभार मानले.
“जनतेच्या सेवेसाठी आपण सदैव कटीबद्ध आहोत,” असे मतही यावेळी व्यक्त करण्यात आले.
