“रक्त देऊया, आशा जागवूया! – वाय.सी.एम. हॉस्पिटलच्या वतीने जागतिक रक्तदाता दिन उत्साहात साजरा”

|| प्रतिनिधी : अमोल बेडके ||

पिंपरी चिंचवड :  जागतिक आरोग्य संघटनेद्वारे 2004 पासून दरवर्षी 14 जून हा दिवस प्रसिद्ध नोबेल पारितोषिक विजेते व रक्तगट शोधणारे शास्त्रज्ञ डॉ. कार्ल लँडस्टिनर यांच्या जन्मदिनी “जागतिक रक्तदाता दिन” म्हणून साजरा केला जातो. याच पार्श्वभूमीवर पिंपरी-चिंचवड महापालिकेच्या वाय.सी.एम. हॉस्पिटल रक्तकेंद्राच्या वतीने शहरातील विविध ठिकाणी रक्तदान शिबिरे आणि ऐच्छिक रक्तदाता शपथवाचनाचे कार्यक्रम आयोजित करण्यात आले.

“रक्त देऊया, आशा जागवूया : एकत्रितपणे जीव वाचवूया!” या संकल्पनेवर आधारित यंदाचा जागतिक रक्तदाता दिन अत्यंत उत्साहात साजरा करण्यात आला. कार्यक्रमात एकूण ५८ रक्तदात्यांनी सहभाग नोंदवून रक्तदान केले.

या कार्यक्रमास पिंपरी-चिंचवड महापालिकेचे आरोग्य वैद्यकीय अधिकारी डॉ. लक्ष्मण गोफणे, वाय.सी.एम. हॉस्पिटलचे विभाग प्रमुख तथा अतिरिक्त आरोग्य वैद्यकीय अधिकारी डॉ. अभयचंद्र दादेवार, रक्त संक्रमण अधिकारी डॉ. नीता घाडगे, चिंचवड देवस्थान ट्रस्टचे श्री. घोडके, तसेच ‘रक्ताचे नाते’ ट्रस्टचे श्री. सुहास हिंगणे यांची प्रमुख उपस्थिती लाभली.

रक्तदान शिबिरात सहभागी झालेल्या सर्व रक्तदात्यांचे पुष्पगुच्छ व सन्मानपत्र देऊन स्वागत करण्यात आले. तसेच राज्य रक्त संक्रमण परिषदेच्या मार्गदर्शक तत्त्वांनुसार ऐच्छिक रक्तदाता शपथवाचन वरिष्ठ रक्ततंत्रज्ञ श्री. गिरीजात्मक जोशी यांच्या मार्गदर्शनाखाली पार पडले.

प्रमुख अतिथी डॉ. गोफणे यांनी आपल्या भाषणात रक्तदानाचे महत्त्व पटवून देत नियमित रक्तदानासाठी युवकांनी पुढे यावे असे आवाहन केले. तसेच विविध संस्था, मंडळे, महाविद्यालये आणि औद्योगिक वसाहतींनी रक्तदान शिबिरांचे आयोजन करून वाय.सी.एम. रक्तकेंद्राला सहकार्य करावे असेही आवर्जून सांगितले.

कार्यक्रमाचे सुत्रसंचालन श्री. किशन गायकवाड (समाजसेवा अधीक्षक, वाय.सी.एम.) यांनी तर आभार प्रदर्शन समुपदेशक श्री. सुनित आवटे यांनी केले.

कार्यक्रमाच्या यशस्वीतेसाठी चिंचवड देवस्थान ट्रस्ट, रक्ताचे नाते ट्रस्ट – महाराष्ट्र राज्य, तसेच रक्तकेंद्राचे अधिकारी डॉ. गणेश लांडे, श्रीमती उर्मिला हजारे आणि उपस्थित सर्व अधिकारी, कर्मचारी यांचे मोलाचे सहकार्य लाभले.