पिंपरी-चिंचवड : चिंचवड पोलीस स्टेशनच्या दामिनी पथकाने दाखविलेल्या तत्परतेमुळे आणि संवेदनशीलतेमुळे हरवलेल्या एका लहान मुलाची त्याच्या आई-वडिलांशी अवघ्या पाच तासांत सुखरूप भेट घडवून आणण्यात यश मिळाले. ही हृदयस्पर्शी घटना १२ जून २०२६ रोजी चिंचवड पोलीस स्टेशनच्या हद्दीत घडली.
बिजलीनगर येथील पुलावर एक लहान मुलगा रडत असल्याचे काही जागरूक नागरिकांच्या निदर्शनास आले. नागरिकांनी मुलाची ओळख पटविण्यासाठी परिसरात चौकशी केली, मात्र कोणालाही त्याच्याबाबत माहिती मिळाली नाही. त्यामुळे संबंधित नागरिकांनी मुलाला चिंचवड पोलीस स्टेशनमध्ये आणून पोलिसांच्या ताब्यात दिले.
मुलगा ताब्यात मिळताच पोलीस उपनिरीक्षक पवार यांच्या मार्गदर्शनाखाली दामिनी पथकातील अश्विनी राक्षे, राणी सिंग आणि ऋतिका लांडे यांनी तातडीने शोधमोहीम सुरू केली. मुलगा मुस्लिम समाजातील असल्याचे लक्षात घेऊन पोलिसांनी परिसरातील मशिदींमध्ये जाऊन माहिती दिली. तसेच विविध माध्यमांतून आणि स्थानिक स्तरावर चौकशी करून मुलाच्या कुटुंबाचा शोध घेण्याचे प्रयत्न सुरू ठेवले.
दामिनी पथकाच्या अथक प्रयत्नांना अखेर यश आले आणि अवघ्या पाच तासांच्या आत मुलाच्या पालकांचा शोध लागला. आवश्यक पडताळणी पूर्ण केल्यानंतर मुलाला त्याच्या आई-वडिलांच्या स्वाधीन करण्यात आले. आपल्या हरवलेल्या मुलाला सुखरूप पाहून पालकांच्या डोळ्यात आनंदाश्रू तरळले.
चिंचवड पोलीस स्टेशनच्या दामिनी पथकाने केलेल्या या उल्लेखनीय कामगिरीमुळे पोलिसांबद्दलचा विश्वास अधिक दृढ झाला असून, नागरिकांकडून दामिनी पथकाचे विशेष कौतुक करण्यात येत आहे. समाजातील अडचणीत सापडलेल्या नागरिकांसाठी पोलिस नेहमीच मदतीला तत्पर असतात, याची प्रचिती या घटनेतून पुन्हा एकदा आली.
