देहूरोड : मावळ तालुक्यातील देहूरोड परिसरात मंगळवारी रात्री धक्कादायक गोळीबाराची घटना घडली असून रमेश रेड्डी यांची अज्ञात हल्लेखोरांनी गोळ्या झाडून हत्या केली आहे. या घटनेमुळे परिसरात भीती आणि तणावाचे वातावरण निर्माण झाले असून नागरिकांमध्ये संतापाची लाट उसळली आहे.
पोलिसांच्या प्राथमिक माहितीनुसार, रात्रीच्या सुमारास रमेश रेड्डी यांच्यावर अज्ञात हल्लेखोरांनी तब्बल नऊ राऊंड गोळीबार केला. यापैकी एक गोळी त्यांच्या डोक्यात लागल्याने ते गंभीर जखमी होऊन जागीच कोसळले. त्यांना तातडीने देहूरोड येथील आधार हॉस्पिटलमध्ये दाखल करण्यात आले. मात्र, उपचार सुरू होण्यापूर्वीच डॉक्टरांनी त्यांना मृत घोषित केले.
घटनेची माहिती मिळताच नातेवाईक, मित्रपरिवार आणि स्थानिक नागरिकांनी मोठा आक्रोश व्यक्त केला. काही काळ जुन्या पुणे-मुंबई महामार्गावर रास्ता रोको करण्याचाही प्रयत्न करण्यात आला. परिस्थिती नियंत्रणात आणण्यासाठी पोलिसांनी तात्काळ हस्तक्षेप करून नागरिकांची समजूत काढली.
त्यानंतर मृतदेह पुढील वैद्यकीय तपासणीसाठी यशवंतराव चव्हाण रुग्णालयात हलविण्यात आला आहे. घटनास्थळी पंचनामा करण्यात आला असून शहरात नाकाबंदी करून आरोपींचा शोध सुरू आहे.
वरिष्ठ अधिकाऱ्यांनी घटनास्थळी भेट देऊन माध्यमांशी बोलताना सांगितले की, या प्रकरणाचा सर्व अंगांनी तपास सुरू असून आरोपींचा शोध घेण्यासाठी विशेष पथके नियुक्त करण्यात आली आहेत. परिसरातील सीसीटीव्ही फुटेज तपासले जात असून लवकरच आरोपींना ताब्यात घेतले जाईल, असा विश्वास त्यांनी व्यक्त केला.
या घटनेनंतर देहूरोड बाजारपेठेतील अनेक दुकाने व्यापाऱ्यांनी बंद ठेवली. परिसरात मोठ्या प्रमाणात पोलीस बंदोबस्त तैनात करण्यात आला असून हत्येमागील नेमके कारण काय, याचा सखोल तपास सुरू आहे.
