पिंपरी चिंचवड : पिंपरी-चिंचवड गुन्हे शाखेच्या युनिट 01 ने उल्लेखनीय कामगिरी करत वर्षभरापासून फरार असलेल्या एका गंभीर गुन्ह्यातील आरोपीला ताब्यात घेतले आहे. आरोपीच्या ताब्यातून धारदार लोखंडी कोयता जप्त करण्यात आला असून त्याच्यावर आर्म ॲक्ट अंतर्गत गुन्हा दाखल करण्यात आला आहे.
दिनांक 15 एप्रिल 2026 रोजी वरिष्ठांच्या मार्गदर्शनाखाली युनिट 01 चे वरिष्ठ पोलीस निरीक्षक नरेंद्र ठाकरे यांच्या नेतृत्वाखाली सहाय्यक पोलीस निरीक्षक दत्तात्रय गुळीग, पोलीस उपनिरीक्षक कर्मराज गावडे तसेच पोहवा विजय शेळकंदे, पोशि खेडकर आणि पोशि चिखलकर हे पाहिजे, फरार व तडीपार आरोपींचा शोध घेत होते. बातमीदारांकडून मिळालेली माहिती आणि तांत्रिक विश्लेषणाच्या आधारे पथकाने तपास सुरू केला.
दरम्यान, निगडी येथील भक्ती-शक्ती पुलाखाली एक इसम हातात धारदार कोयता घेऊन उभा असल्याची गोपनीय व खात्रीशीर माहिती पोलीस पथकाला मिळाली. मिळालेल्या माहितीच्या आधारे पथकाने तत्काळ घटनास्थळी धाव घेत सापळा रचला. संशयित इसम दिसताच पोलिसांनी शिताफीने त्याला ताब्यात घेत त्याच्या हातातील धारदार लोखंडी कोयता जप्त केला.
तपासादरम्यान आरोपीने आपले नाव सत्यजित उर्फ प्रवीण प्रभाकर रोकडे (वय 25, रा. भीमशक्ती नगर, स्पाईन रोड, मैत्री वस्ती, चिखली, पुणे) असे सांगितले. पुढील चौकशीत तो निगडी पोलीस ठाण्यात दाखल असलेल्या गुन्हा रजिस्टर क्रमांक 776/2025 मधील भारतीय न्याय संहिता कलम 311, 115(2), 352 तसेच संबंधित इतर कलमान्वये दाखल गंभीर गुन्ह्यातील वर्षभरापासून फरार असलेला पाहिजे आरोपी असल्याचे निष्पन्न झाले.
पोलिसांनी आरोपीकडून जप्त करण्यात आलेल्या धारदार कोयत्याचा पंचनामा करून तो मुद्देमाल ताब्यात घेतला. त्यानंतर वैद्यकीय तपासणी पूर्ण करून सरकारतर्फे फिर्याद दाखल करण्यात आली. आरोपीविरुद्ध भारतीय हत्यार कायदा अधिनियम कलम 4(25) तसेच महाराष्ट्र पोलीस कायदा कलम 37(1)(3) सह 135 अन्वये गुन्हा दाखल करण्यात आला आहे.
सदर आरोपीला पुढील तपास आणि कायदेशीर कार्यवाहीसाठी जप्त मुद्देमालासह निगडी पोलीस ठाण्याच्या वरिष्ठ पोलीस निरीक्षकांच्या ताब्यात देण्यात आले आहे. गुन्हे शाखा युनिट 01 च्या या धाडसी कारवाईमुळे परिसरातील नागरिकांमध्ये समाधान व्यक्त होत असून पोलिसांच्या सतर्कतेचे कौतुक केले जात आहे.
