|| प्रतिनिधी : प्रशांत पटाडे ||
म्हाळुंगे : पिंपरी-चिंचवड पोलीस आयुक्तालयाच्या हद्दीतील अवैध हातभट्टी दारू व्यवसायाचे समूळ उच्चाटन करण्यासाठी दक्षिण महाळुंगे एमआयडीसी पोलिसांनी मोठी कारवाई केली आहे. मा. पोलीस आयुक्त विनयकुमार चौबे यांच्या आदेशानुसार राबविण्यात आलेल्या विशेष मोहिमेत अवैध हातभट्टी दारू विक्रीसाठी उभारण्यात आलेली सहा ठिकाणे जेसीबीच्या सहाय्याने जमीनदोस्त करण्यात आली.
मा. पोलीस उप आयुक्त (परिमंडळ-४) श्वेता खेडकर आणि सहाय्यक पोलीस आयुक्त सचिन कदम यांच्या मार्गदर्शनाखाली दक्षिण महाळुंगे एमआयडीसी पोलीस ठाण्याचे वरिष्ठ पोलीस निरीक्षक विजय ढमाळ यांच्या नेतृत्वाखाली ही कारवाई करण्यात आली. कारवाईदरम्यान दारू विक्रीची ठिकाणे अनधिकृतपणे उभारण्यात आल्याचे निदर्शनास आल्यानंतर एमआयडीसी विभागाशी समन्वय साधून ती निष्कासित करण्याची प्रक्रिया सुरू करण्यात आली.
दिनांक ११ जून २०२६ रोजी दक्षिण महाळुंगे एमआयडीसी पोलीस, राज्य उत्पादन शुल्क विभाग आणि एमआयडीसी विभाग यांच्या संयुक्त पथकाने महाळुंगे, निघोजे, कुरुळी आणि तळवडे परिसरातील सहा अवैध हातभट्टी दारू विक्री केंद्रांवर कारवाई करून ती जेसीबीच्या सहाय्याने कायमची नष्ट केली.
या कारवाईत दुरेश रमेश राठोड, लखन जडजा शिंदे, पुष्पादेवी शांतीलाल जाट, लखन हाजुरीया ठाकूर, उदय अशोक कलाल आणि सुश्मिता बंडू हितेज यांच्याशी संबंधित अवैध दारू विक्रीची ठिकाणे नेस्तनाबूत करण्यात आली.
सदर कारवाई मा. पोलीस आयुक्त विनयकुमार चौबे, सह पोलीस आयुक्त डॉ. शशिकांत महावरकर, अपर पोलीस आयुक्त डॉ. सारंग आवाड, अपर पोलीस आयुक्त डॉ. बसवराज तेली, पोलीस उप आयुक्त श्वेता खेडकर यांच्या मार्गदर्शनाखाली पार पडली. या मोहिमेत सहाय्यक पोलीस आयुक्त सचिन कदम, वरिष्ठ पोलीस निरीक्षक विजय ढमाळ, दक्षिण महाळुंगे एमआयडीसी पोलीस ठाण्याचे अधिकारी व अंमलदार, राज्य उत्पादन शुल्क विभागाचे पोलीस निरीक्षक दिवसे व त्यांचे पथक तसेच एमआयडीसी विभागाचे अधिकारी कर्डीले व त्यांच्या पथकाने सहभाग घेतला.
अवैध दारू व्यवसायाविरोधातील ही कारवाई पुढेही सुरू राहणार असून कायद्याचे उल्लंघन करणाऱ्यांवर कठोर कारवाई करण्यात येणार असल्याचा इशारा पोलिसांनी दिला आहे.
