पिंपरी चिंचवड : युनिट-१ची धडाकेबाज कामगिरी चिंचवड पोलीस स्टेशन हद्दीत घडलेल्या एका गंभीर घटनेचा गुन्हा दाखल होण्यापूर्वीच छडा लावत गुन्हे शाखा युनिट-१ ने आरोपीस ताब्यात घेऊन उल्लेखनीय कामगिरी केली आहे.
रविवार (दि. 29 मार्च 2026) रोजी वाल्हेकरवाडी येथील अर्थव पार्क परिसरात, ममिली मंगल कार्यालयाजवळ श्री. सतीश शिंदे यांच्या घराच्या दुरुस्तीचे काम सुरू होते. यावेळी कामगार पुनीत रामनक्षत्र शुक्ला (वय 28) व केशवकुमार मोहन महातो (वय 29) हे दोघे तिसऱ्या मजल्यावर काम करत असताना त्यांच्यात वाद झाला. वादाचे रूपांतर मारहाणीमध्ये झाले आणि त्यावेळी शुक्ला याने महातो यास धक्का दिल्याने तो तिसऱ्या मजल्यावरून खाली पडला. या घटनेत महातो याचा जागीच मृत्यू झाला.
घटनेची माहिती मिळताच गुन्हे शाखा युनिट-१ चे वरिष्ठ पोलीस निरीक्षक नरेंद्र ठाकरे यांच्या मार्गदर्शनाखाली सहाय्यक पोलीस निरीक्षक दत्तात्रय गुळीग व त्यांच्या पथकाने तात्काळ तपास सुरू केला. पोलीस हवालदार जयवंत राऊत, पोलीस शिपाई लक्ष्मीकांत पतंगे, विजय जानराव व तेजस भालचिम यांनी घटनास्थळी भेट देऊन माहिती संकलित केली.
तपासादरम्यान मिळालेल्या गुप्त माहितीनुसार आरोपी संभाजीनगर येथील बर्ड व्हॅली गार्डन परिसरात लपून बसल्याचे समोर आले. पोलिसांनी तत्काळ सापळा रचून आरोपीचा पाठलाग केला व घरकुल रोड परिसरातून त्याला ताब्यात घेतले.
आरोपीची वैद्यकीय तपासणी करून पुढील कारवाईसाठी त्यास चिंचवड पोलीस स्टेशनच्या ताब्यात देण्यात आले आहे.
गंभीर स्वरूपाच्या या घटनेत वेगाने कारवाई करत आरोपीस अटक करण्यात गुन्हे शाखा युनिट-१ ने दाखवलेली तत्परता कौतुकास्पद मानली जात आहे.
