पिंपरी-चिंचवड : पिंपरी-चिंचवड पोलीस आयुक्तालयाच्या गुन्हे शाखा युनिट-३ ने अवैध दारू विक्रीविरोधात मोठी कारवाई करत तब्बल २,००,४८० रुपयांची विनापरवाना विदेशी दारू जप्त केली आहे. या कारवाईत तीन जणांना अटक करण्यात आली असून त्यांच्या विरोधात दिघी पोलीस ठाण्यात गुन्हा दाखल करण्यात आला आहे.
पोलीस आयुक्त विनयकुमार चौबे यांच्या मार्गदर्शनाखाली अवैध धंद्यांवर कारवाई करण्याच्या मोहिमेत ही कारवाई करण्यात आली. गुन्हे शाखा युनिट-३ चे वरिष्ठ पोलीस निरीक्षक संतोष कसबे यांच्या नेतृत्वाखालील पथक पेट्रोलिंग करत असताना पोलीस अंमलदार सोमनाथ बोऱ्हाडे यांना गुप्त माहिती मिळाली. त्यानुसार दाभाडे सरकार चौक परिसरातील चऱ्होली येथील एका शेतातील पत्र्याच्या शेडमध्ये अवैध विदेशी दारू साठवून विक्री केली जात असल्याचे निष्पन्न झाले.
मिळालेल्या खात्रीशीर माहितीनुसार पोलिसांनी सापळा रचून छापा टाकला. यावेळी रामप्रसाद साहेबराव साळुंखे (वय ३३, रा. चऱ्होली खुर्द), तिलक हेमंत पटेल (वय २१, रा. वापी, गुजरात) आणि अनिल रामसुरत यादव (वय २४, रा. वापी, गुजरात) यांना ताब्यात घेण्यात आले.
आरोपींकडून २० खाकी रंगाचे बॉक्स आणि २ गोण्यांमध्ये साठवलेली विदेशी दारू जप्त करण्यात आली. यात रॉयल चॅलेंज, इम्पीरियल ब्ल्यू आणि रॉयल स्टॅग या ब्रँडच्या दारूच्या बाटल्यांचा समावेश आहे. याशिवाय तीन मोबाईल फोनही पोलिसांनी जप्त केले आहेत.
ही कारवाई पोलीस सह आयुक्त डॉ. शशिकांत महावरकर, अपर पोलीस आयुक्त सारंग आवाड, पोलीस उपआयुक्त (गुन्हे) डॉ. शिवाजी पवार आणि सहायक पोलीस आयुक्त डॉ. विशाल हिरे यांच्या मार्गदर्शनाखाली पार पडली. या यशस्वी कारवाईमुळे परिसरातील अवैध दारू विक्रीला मोठा आळा बसण्याची शक्यता व्यक्त होत आहे.
