|| प्रतिनिधी : शुभम जाधव ||
देहूरोड : तक्रारी मागे घेण्यासाठी खंडणी मागितल्या प्रकरणी देहूरोड पोलीस ठाण्यात तिघांविरुद्ध गुन्हा दाखल करण्यात आला आहे. आरोपींनी फिर्यादी यांच्याकडून ४० लाख रुपयांची मागणी करत धमकी दिली. हा प्रकार गुरुवारी (दि. २०) उघडकीस आला.
प्रदीप वसंतराव चव्हाण (५४, रा. मातोश्री निवास, मेन बाजार, देहूरोड) यांनी फिर्याद दिली आहे, त्यानुसार, किरण परशुराम गवळी (३६. रा. पारशी चाळ, देहूरोड), सचिन देशपांडे (४०, रा. तळेगाव दाभाडे), धनराज शिंदे (५२, रा. देहूरोड बाजार) यांच्यावर गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी प्रदीप चव्हाण यांचे रावेत येथे तत्त्व रेसिडेन्सी नावाने गृहप्रकल्पाचे बांधकाम सुरू आहे. आरोपींनी बांधकाम बंद करण्याच्या उद्देशाने विविध सरकारी कार्यालये आणि पिंपरी-चिंचवड महापालिकेच्या बांधकाम विभागात तक्रारी केल्या होत्या. या तक्रारी मिटवण्यासाठी आरोपींनी आपसात संगनमत करून फिर्यादी यांच्याकडे ४० लाख रुपयांची खंडणी मागितली. पैसे न दिल्यास जिवे मारण्याची धमकी दिल्याचे फिर्यादीत नमूद आहे. देहूरोड पोलीस करीत आहेत.
