|| प्रतिनिधी : अमोल बेडके ||
पिंपरी-चिंचवड : पिंपरी-चिंचवड शहराच्या राजकारणात निवडणुकीच्या तोंडावर भारतीय जनता पक्षाने निर्णायक आघाडी घेतली असून, निवडणूक प्रमुख तथा आमदार शंकर जगताप यांच्या नेतृत्वाखाली भाजपमध्ये विविध पक्षांतील मातब्बर, अनुभवी आणि जनाधार असलेल्या नेत्यांचा जम्बो प्रवेश झाला आहे. या घडामोडीमुळे शहरातील राजकीय समीकरणे बदलली असून विरोधी पक्षांच्या गटात खळबळ उडाली आहे.
भाजपच्या माध्यमातून पिंपरी-चिंचवड शहराची मेट्रो सिटी, स्मार्ट सिटी आणि मेट्रोपॉलिटन सिटीकडे वाटचाल सुरू आहे. विकासावर विश्वास ठेवत शहराच्या प्रगतीत सहभागी होण्याच्या उद्देशाने विविध पक्षांतील अनेक दिग्गज नेत्यांनी भाजपमध्ये प्रवेश केल्याचे यावेळी स्पष्ट झाले. हा प्रवेश म्हणजे केवळ पक्षांतर नसून शहर विकासाच्या दिशेने टाकलेले ठोस पाऊल असल्याचे राजकीय वर्तुळात बोलले जात आहे.
मुंबई येथे पार पडलेल्या या भव्य प्रवेश सोहळ्यात ठाकरे गटाचे शहराध्यक्ष संजोग वाघेरे, अजित पवार गटाच्या माजी स्थायी समिती अध्यक्षा उषा वाघेरे, माजी उपमहापौर प्रभाकर वाघेरे, माजी स्थायी समिती अध्यक्ष प्रशांत शितोळे, शरद पवार गटाचे माजी स्थायी समिती अध्यक्ष नवनाथ जगताप, माजी उपमहापौर राजू मिसाळ, माजी नगरसेवक समीर मासुळकर, भाजपचे माजी नगरसेवक रवी लांडगे, माजी नगरसेवक जालिंदर शिंदे, अमित गावडे, महायुतीचे कार्यकर्ते व माजी अपक्ष नगरसेवक संजय काटे, ठाकरे गटाच्या माजी नगरसेविका मीनल यादव, माजी महापौर मंगला कदम यांचे पुत्र कुशाग्र कदम, तसेच अजित पवार गटाचे माजी नगरसेवक प्रसाद शेट्टी आणि विनोद नढे यांनी भाजपमध्ये जाहीर प्रवेश केला.
या जम्बो प्रवेशामुळे पिंपरी-चिंचवड शहरातील भाजप संघटना अधिक बळकट झाली असून आगामी निवडणुकांच्या पार्श्वभूमीवर हा भाजपासाठी मोठा राजकीय लाभ मानला जात आहे. शहराच्या सर्वांगीण विकासासाठी भाजप अधिक प्रभावीपणे काम करेल, असा विश्वास यावेळी व्यक्त करण्यात आला.
प्रदेशाध्यक्ष रवींद्र चव्हाण, निवडणूक प्रमुख तथा आमदार शंकर जगताप, आमदार महेश लांडगे आणि शहराध्यक्ष शत्रुघ्न काटे यांच्या प्रमुख उपस्थितीत हा प्रवेश सोहळा पार पडला.
“शहर विकासाची घोडदौड कायम ठेवणार” – आमदार शंकर जगताप
सर्व नव्याने पक्षात प्रवेश केलेल्या नेत्यांचे स्वागत करताना निवडणूक प्रमुख आमदार शंकर जगताप म्हणाले की, पिंपरी-चिंचवड हे औद्योगिक नगरी, आयटी-सीटी आणि स्मार्ट सिटी म्हणून ओळखले जाते. या शहरात रोजगाराच्या संधींसोबतच अत्याधुनिक सुविधा नागरिकांना मिळाल्या आहेत. शहराच्या या प्रगतीमागे येथील लोकप्रतिनिधींची विकासाभिमुख भूमिका महत्त्वाची ठरली आहे.
पक्षीय मतभेद बाजूला ठेवून शहरहिताला प्राधान्य देणारी हीच भूमिका आज भाजपमध्ये प्रवेश केलेल्या प्रत्येकाने स्वीकारली आहे. त्यांच्या सहकार्याने आगामी काळात पिंपरी-चिंचवड शहर विकासाची घोडदौड अधिक वेगाने आणि प्रभावीपणे सुरू राहील, असा ठाम विश्वास आमदार शंकर जगताप यांनी व्यक्त केला.
