|| प्रतिनिधी : प्रभु कांगणे ||
पिंपरी-चिंचवड :शहरातील वाढत्या गुन्हेगारीला आळा घालण्यासाठी संत तुकारामनगर पोलीस ठाण्याच्या तपास पथकाने प्रभावी व धडाकेबाज कारवाई करत ३ आरोपींना अटक केली आहे. आरोपींकडून २ गावठी पिस्टल, २ जिवंत काडतुसे आणि एक मोटारसायकल असा एकूण २ लाख २ हजार १०० रुपयांचा मुद्देमाल जप्त करण्यात आला आहे. या कारवाईमुळे परिसरात बेकायदेशीर शस्त्र बाळगणाऱ्या टोळ्यांमध्ये खळबळ उडाली आहे.
मिळालेल्या माहितीनुसार, संत तुकारामनगर पोलिसांना गोपनीय बातमीदारामार्फत काही संशयित इसम अवैध शस्त्रांसह फिरत असल्याची माहिती मिळाली होती. त्यानुसार तपास पथकाने तातडीने हालचाली करत एच.ए. ग्राउंड, संत तुकारामनगर येथे सापळा रचला. योग्य वेळी कारवाई करत दीपक भास्कर बर्फे (वय २६, रा. पिंपळे गुरव), अतुल बबन भालेराव (वय ३१, रा. दापोडी) आणि मुकेश राम काची (वय २६, रा. दापोडी) या तिघांना ताब्यात घेण्यात आले.
ताब्यात घेतल्यानंतर आरोपींची कसून झडती व चौकशी करण्यात आली असता त्यांच्या जवळून २ गावठी पिस्टल आणि २ जिवंत काडतुसे आढळून आली. तसेच गुन्ह्यात वापरण्याच्या उद्देशाने ठेवलेली मोटारसायकलही जप्त करण्यात आली. पोलिसांच्या या वेळीच केलेल्या कारवाईमुळे संभाव्य गंभीर गुन्हा उघड होण्यापासून रोखण्यात यश आल्याचे सांगितले जात आहे.
या प्रकरणी संत तुकारामनगर पोलीस ठाण्यात गुन्हा रजि. नं. १५४/२०२६ दाखल करण्यात आला असून भारतीय न्याय संहिता, भारतीय शस्त्र अधिनियम १९५९ तसेच महाराष्ट्र पोलीस अधिनियम १९५१ अंतर्गत विविध कलमान्वये गुन्हा नोंदविण्यात आला आहे. तिन्ही आरोपींना अटक करण्यात आली असून त्यांच्याकडून आणखी माहिती मिळविण्याचे काम सुरू आहे. पुढील तपास पोलीस उपनिरीक्षक विनायक पाटील करत आहेत.
पिंपरी-चिंचवड पोलीस आयुक्त श्री. विनयकुमार चौबे यांच्या मार्गदर्शनाखाली शहरातील अवैध शस्त्र बाळगणाऱ्यांविरोधात विशेष मोहीम राबविण्यात येत आहे. त्यानुसार पोलीस उपआयुक्त संदिप आटोळे व सहायक पोलीस आयुक्त सचिन हिरे यांनी संत तुकारामनगर पोलीस ठाण्याच्या अधिकाऱ्यांना योग्य दिशा व मार्गदर्शन केले होते. या पार्श्वभूमीवर वरिष्ठ पोलीस निरीक्षक सुहास आव्हाड यांच्या नेतृत्वाखाली पोलीस निरीक्षक (गुन्हे) गोरख कुंभार, पोलीस उपनिरीक्षक विनायक पाटील तसेच पोलीस अंमलदार संतोष रजपुत, जावेद मुजावर, ज्ञानेश्वर भुरे, भागवत गायकवाड, विठ्ठल भारमळ, दत्तु पाटेकर, अनिल मोहीते, सुनिल धावारे यांनी समन्वय साधत ही कारवाई यशस्वीरीत्या पार पाडली.
