|| प्रतिनिधी : अमोल बेडके ||
पिंपरी-चिंचवड : पिंपरी-चिंचवड महानगरपालिकेच्या हद्दीत येणाऱ्या प्रभाग क्रमांक १६ व १७ मध्ये मोठ्या प्रमाणात अनधिकृत बांधकामे सुरू असल्याचा गंभीर आरोप समोर आला आहे. या प्रकरणी संबंधित क्षेत्रीय अधिकारी व बीट मार्शल यांच्या कार्यपद्धतीवर प्रश्नचिन्ह उपस्थित करत त्यांच्या सखोल चौकशीसह तात्काळ निलंबनाची मागणी करण्यात आली आहे.
याबाबत महापालिका आयुक्तांना सादर करण्यात आलेल्या निवेदनात नमूद करण्यात आले आहे की, संबंधित प्रभागांमध्ये अनेक ठिकाणी चार-चार मजली इमारती बेकायदेशीररित्या उभारण्यात येत आहेत. ही बाब अत्यंत गंभीर असतानाही प्रशासनाकडून कोणतीही ठोस कारवाई होत नसल्यामुळे नागरिकांमध्ये तीव्र नाराजी व्यक्त होत आहे.
निवेदनात पुढे असेही म्हटले आहे की, मोठ्या प्रमाणातील अनधिकृत बांधकामांकडे जाणीवपूर्वक दुर्लक्ष केले जात असताना, सामान्य नागरिकांच्या लहान स्वरूपाच्या बांधकामांवर मात्र तात्काळ कारवाई केली जाते. या दुहेरी भूमिकेमुळे संबंधित अधिकारी आणि बीट मार्शल यांच्या कामकाजावर संशय निर्माण झाला आहे.
स्थानिक पातळीवरील माहितीच्या आधारे काही अधिकाऱ्यांचे ठेकेदारांशी आर्थिक हितसंबंध असल्याचा संशय व्यक्त करण्यात आला असून, त्यामुळेच मोठ्या अनधिकृत बांधकामांवर कारवाई होत नसल्याचा आरोप करण्यात आला आहे. या प्रकारामुळे प्रशासनाच्या विश्वासार्हतेलाही धक्का बसत असल्याचे निवेदनात नमूद करण्यात आले आहे.
दरम्यान, अशा अनधिकृत बांधकामांमुळे भविष्यात अपघात किंवा जीवितहानी होण्याची शक्यता नाकारता येत नसल्याने हा प्रश्न केवळ प्रशासकीय नसून सार्वजनिक सुरक्षेशी संबंधित असल्याचेही अधोरेखित करण्यात आले आहे.
मुख्य मागण्या पुढीलप्रमाणे :
● संबंधित क्षेत्रीय अधिकारी व बीट मार्शल यांची उच्चस्तरीय, निष्पक्ष व सखोल चौकशी करावी.
● चौकशीदरम्यान संबंधित अधिकाऱ्यांना तात्काळ निलंबित करावे.
● प्रभाग १६ व १७ मधील सर्व अनधिकृत बांधकामांवर तात्काळ तोडफोड कारवाई करावी.
● भविष्यात अशा प्रकारांना आळा घालण्यासाठी जबाबदार अधिकाऱ्यांवर कडक उत्तरदायित्व निश्चित करावे.
या गंभीर प्रकरणाची तातडीने दखल घेऊन कठोर निर्णय घ्यावा, अशी मागणी नागरिकांकडून करण्यात येत आहे.
