पिंपरी-चिंचवड : हिंजवडी परिसरात पहाटे मॉर्निंग वॉकला जाणाऱ्या महिलांना लक्ष्य करणाऱ्या सोनसाखळी चोरट्यांचा पर्दाफाश करण्यात हिंजवडी पोलीस ठाण्याच्या गुन्हे शोध पथकाला मोठे यश मिळाले आहे. या कारवाईत एका आरोपीस अटक करण्यात आली असून चोरीस गेलेले सुमारे दोन तोळे वजनाचे सोन्याचे मिनी गंठण जप्त करण्यात आले आहे.
दिनांक ७ मार्च रोजी सकाळी सुमारे ६ वाजण्याच्या सुमारास फिर्यादी महिला मॉर्निंग वॉकसाठी गेल्या असताना मोटारसायकलवरून आलेल्या दोन अज्ञात इसमांनी त्यांच्या गळ्यातील सोन्याचे गंठण जबरदस्तीने ओढून घेतले. यावेळी महिलेला ढकलून जखमी करण्यात आले. याप्रकरणी हिंजवडी पोलीस ठाण्यात भारतीय न्याय संहिता कलम ३०९(६) अन्वये गुन्हा दाखल करण्यात आला होता.
या गुन्ह्याचा तपास करताना पोलिसांनी घटनास्थळ व परिसरातील १०० हून अधिक सीसीटीव्ही फुटेजची तपासणी केली. तसेच तांत्रिक विश्लेषणाच्या आधारे आरोपींचा माग काढण्यात आला. तपासादरम्यान ओमकार राजेश चनसोडे (वय २३, रा. घुले वस्ती, मांजरी, पुणे) याला शिताफीने ताब्यात घेण्यात आले. चौकशीत त्याने आपल्या साथीदार विशाल विलास काळे याच्या मदतीने गुन्हा केल्याची कबुली दिली.
अटक आरोपीकडून चोरीस गेलेले सोन्याचे गंठण जप्त करण्यात आले असून पुढील तपासात अशाच प्रकारचे इतर गुन्हे उघडकीस येण्याची शक्यता पोलिसांनी व्यक्त केली आहे. या प्रकरणाचा अधिक तपास सहायक पोलीस निरीक्षक सोमनाथ पांचाळ करीत आहेत.
ही उल्लेखनीय कारवाई पोलीस आयुक्त विनयकुमार चौबे, सहपोलीस आयुक्त डॉ. शशीकांत महावरकर, अपर पोलीस आयुक्त बसवराज तेली व सारंग आवाड, तसेच पोलीस उपआयुक्त विशाल गायकवाड यांच्या मार्गदर्शनाखाली पार पडली. वरिष्ठ पोलीस निरीक्षक बालाजी पांढरे, पोलीस निरीक्षक (गुन्हे) हृषिकेश घाडगे व त्यांच्या पथकाने ही कामगिरी यशस्वी केली.
हिंजवडी पोलिसांच्या या धडाकेबाज कारवाईमुळे नागरिकांमध्ये सुरक्षिततेची भावना अधिक दृढ झाली असून, गुन्हेगारांवर पोलिसांची कडक नजर असल्याचे पुन्हा एकदा अधोरेखित झाले आहे.
