🇮🇳 देशभक्तीच्या गीतांनी दुमदुमला दगडोबा चौक व्यापारी संघटना व लिटिल स्टार स्कूलतर्फे स्वातंत्र्य दिन जल्लोषात.

|| प्रतिनिधी : अमोल बेडके ||

पिंपरी-चिंचवड : स्वातंत्र्य, एकता आणि देशभक्तीचा संदेश देणाऱ्या देशभक्ती गीतांच्या सुरांनी दगडोबा चौक दुमदुमून गेला. दगडोबा चौक व्यापारी संघटना आणि लिटिल स्टार इंग्लिश मीडियम स्कूलतर्फे ७९वा स्वातंत्र्य दिन मोठ्या उत्साहात व जल्लोषात साजरा करण्यात आला.

कार्यक्रमाची सुरुवात ध्वजारोहण सोहळ्याने झाली. मान्यवर शेखर अण्णा चिंचवडे यांच्या हस्ते ध्वजवंदन करण्यात आले. या वेळी त्यांनी विद्यार्थ्यांना व नागरिकांना स्वातंत्र्य दिनाच्या शुभेच्छा देत, “स्वातंत्र्य ही आपली सर्वात मोठी संपत्ती आहे, ती जपणे ही प्रत्येक भारतीयाची जबाबदारी आहे,” असा संदेश दिला.

यानंतर लिटिल स्टार इंग्लिश मीडियम स्कूलच्या चिमुकल्यांनी देशभक्तीपर गीतांवर नृत्य, भाषणे आणि रंगतदार सांस्कृतिक कार्यक्रम सादर करून उपस्थितांचे मन मोहून टाकले. मुलांच्या सादरीकरणात देशावरील प्रेम, बलिदान आणि एकतेचा संदेश ठळकपणे उमटला.

कार्यक्रमाला राजेंद्र चिंचवडे, आशाताई सूर्यवंशी, संघटनेचे आधारस्तंभ नारायण तात्या चिंचवडे, व्यापारी संघटनेचे अध्यक्ष कासिम बागवान, उपाध्यक्ष आयाज सनदी, सेक्रेटरी राजू मोहिते, सभासद मच्छिंद्र मिटकर, विवेक बागुल यांच्यासह परिसरातील सर्व व्यापारी वर्ग मोठ्या संख्येने उपस्थित होता.

या सोहळ्यात व्यापारी वर्ग व शालेय विद्यार्थ्यांनी एकत्र येऊन स्वातंत्र्य दिन साजरा केल्याने परिसरात देशभक्तीचा आणि ऐक्याचा अनोखा माहोल अनुभवायला मिळाला.