|| प्रतिनिधी : अमोल बेडके ||
रावेत : येथील ओजस्वी सोसायटीमध्ये दिनांक २६ जानेवारी रोजी ७७ वा प्रजासत्ताक दिन सोहळा मोठ्या उत्साहात आणि देशभक्तीच्या वातावरणात साजरा करण्यात आला. यावेळी सोसायटीच्या आवारात राष्ट्रीय ध्वजवंदन करून संविधानाच्या मूल्यांप्रती निष्ठा व्यक्त करण्यात आली.
सोसायटीच्या वतीने दरवर्षीप्रमाणे यंदाही समाजातील मान्यवर डॉक्टर, वकील, शिक्षक तसेच विविध क्षेत्रातील नागरिकांना ध्वजवंदनाचा मान देण्यात येतो. यावर्षीचा कार्यक्रम विशेष ठरला तो संरक्षण दलातील माजी सैनिकांच्या उपस्थितीमुळे.
या कार्यक्रमासाठी प्रमुख पाहुणे म्हणून माजी सैनिक व संरक्षण विभागातील अधिकारी उपस्थित होते. त्यामध्ये
श्री. पुष्करसिंग अमरसिंग जाधव (नाईक, मराठा लाइट इन्फेंट्री),
सुभेदार श्री. विनायक भाऊराव महाजन
आणि श्री. अनिलदत्त सोनार साहेब यांचा समावेश होता.
प्रमुख पाहुण्यांनी आपल्या देशसेवेतील अनुभव कथन करत समाजाला मार्गदर्शन केले. तरुण पिढीने शिस्त, प्रामाणिकपणा, कर्तव्यभावना आणि राष्ट्रप्रेम जपावे, असे मौल्यवान विचार त्यांनी यावेळी व्यक्त केले.
कार्यक्रमाचे सूत्रसंचालन सोसायटीचे सेक्रेटरी श्री. विपुल घोलप यांनी केले. तसेच यावेळी श्री. पाटील काका यांनी कुटुंब प्रबोधन, सामाजिक समरसता आणि पर्यावरण संरक्षण या विषयांवर मार्गदर्शन केले.
पाण्याचा योग्य वापर, कचरा न करणे, झाडे लावणे, सिंगल युज प्लास्टिक टाळणे व कापडी पिशव्यांचा वापर करण्याबाबत नागरिकांमध्ये जनजागृती करण्यात आली.
या सोहळ्यात लहान मुलांची भाषणे तसेच सांस्कृतिक कार्यक्रम उत्स्फूर्तपणे सादर झाले. सर्व सभासदांनी एकत्र येत राष्ट्रीय एकात्मता, बंधुभाव व सामाजिक जबाबदारी यांचा संदेश दिला.
कार्यक्रमाचा समारोप सोसायटीचे अध्यक्ष श्री. अरुण खरमाळे यांच्या आभार प्रदर्शनाने करण्यात आला. उपस्थित प्रमुख पाहुणे, ज्येष्ठ नागरिक, महिला वर्ग, रहिवासी आणि कार्यक्रमाच्या यशस्वी आयोजनासाठी सहकार्य करणाऱ्या सर्वांचे त्यांनी मनःपूर्वक आभार मानले.
