|| प्रतिनिधी : प्रशांत पटाडे ||
पुणे : उन्हाळी सुट्ट्यांचा हंगाम सुरू होताच नागरिक मोठ्या प्रमाणात वॉटरपार्ककडे वळत आहेत. मात्र अशाच एका सहलीदरम्यान पुण्यातील एका प्रसिद्ध वॉटरपार्कमध्ये अत्यंत धक्कादायक आणि गंभीर दुर्घटना घडली आहे. वॉटर स्लाइडवरून घसरताना झालेल्या अपघातात एका महिलेचे अर्धे शरीर कायमस्वरूपी निकामी झाल्याची माहिती समोर आली आहे.
अश्विनी संदीप नप्ते (वय ३७, रा. करंदी) या आपल्या कुटुंबासह मोराची चिंचोली येथील जय मल्हार कृषी पर्यटन केंद्र वॉटरपार्कमध्ये सहलीसाठी गेल्या होत्या. दरम्यान, वॉटर स्लाइडवरून घसरताना पाण्याची पातळी अत्यंत कमी असल्यामुळे त्या जोरात खाली आपटल्या. या धक्क्यात त्या बेशुद्ध पडल्या.
घटनेनंतर वॉटरपार्कमध्ये तातडीची वैद्यकीय सुविधा किंवा रुग्णवाहिका उपलब्ध नसल्याचा आरोप नातेवाईकांनी केला आहे. त्यामुळे त्यांना खाजगी रुग्णवाहिकेतून रुग्णालयात हलवावे लागले. वैद्यकीय तपासणीत त्यांच्या पाठीचे चार मणके तुटल्याचे निष्पन्न झाले असून डॉक्टरांनी त्यांचे अर्धे शरीर कायमस्वरूपी निकामी झाल्याचे स्पष्ट केले आहे.
या गंभीर प्रकारामुळे वॉटरपार्कमधील सुरक्षेच्या उपाययोजनांवर मोठे प्रश्नचिन्ह निर्माण झाले आहे. या प्रकरणी किरण नप्ते यांनी दिलेल्या फिर्यादीवरून शिरूर पोलीस ठाण्यात वॉटरपार्कचे मालक व व्यवस्थापकांविरोधात गुन्हा दाखल करण्यात आला आहे. पोलिसांनी घटनास्थळी पंचनामा करून पुढील तपास सुरू केला आहे.
या घटनेमुळे वॉटरपार्कमध्ये सुरक्षेच्या नियमांचे काटेकोर पालन होते का, याबाबत प्रशासन आणि नागरिकांकडून चिंता व्यक्त केली जात आहे.
