🥇 ताडीवाला रोडच्या चंद्रिकाचे सुवर्णपंख! आशियाई क्रीडा स्पर्धेत भारतासाठी सुवर्णपदक.
प्रज्ञा शिक्षण प्रसारक मंडळ, थेरगाव व युवा विकास मंच तर्फे सुवर्णकन्येचा गौरव.

|| प्रतिनिधी : अमोल बेडके ||

पिंपरी चिंचवड : विश्वरत्न परमपूज्य बोधिसत्व डॉ. बाबासाहेब आंबेडकर शाळा प्रवेश दिनानिमित्त प्रज्ञा शिक्षण प्रसारक मंडळ, थेरगाव यांच्या वतीने आयोजित कार्यक्रमात नुकत्याच झालेल्या आशियाई क्रीडा स्पर्धा 2025, बेहरेन मध्ये सुवर्णपदक विजेती बॉक्सर चंद्रिका बोरेशी पुजारी हिचा भव्य सत्कार करण्यात आला.

चंद्रिकाने 54 किलो वजनी गटातील बॉक्सिंग स्पर्धेत सुवर्णपदक पटकावत भारताचे नाव जागतिक स्तरावर उज्वल केले. ती आर्मी स्पोर्ट्स इन्स्टिट्यूट, पुणे व युवा विकास मंच यांच्या वतीने भारताचे प्रतिनिधित्व करत होती.

ताडीवाला रोडच्या झोपडपट्टीत दहा बाय दहाच्या छोट्या खोलीत राहून प्रतिकूल परिस्थितीला तोंड देत तिने अथक परिश्रम आणि जिद्दीच्या जोरावर आज सुवर्णपदक जिंकले. तिच्या यशामागे तिचे प्रशिक्षक जयंत शिंदे यांचे मार्गदर्शन आणि युवा विकास मंचाचे प्रयत्न मोलाचे ठरले.

युवा विकास मंचाचे सदस्य शुभम चव्हाण म्हणाले,

   “गुन्हेगारी आणि अंधारातून झोपडपट्टीतून उगवलेली ही सुवर्णकन्या आज देशाचा मान उंचावते आहे. या परिसरात लावलेले आमचे सामाजिक कार्याचे रोपटं आज फुलले आहे.”

या कार्यक्रमाला प्रमुख उपस्थिती म्हणून सचिन शिंदे (संस्थापक अध्यक्ष, युवा विकास मंच), नितीन गवळी (उपाध्यक्ष, प्रज्ञा शिक्षण प्रसारक मंडळ, थेरगाव), शुभम चव्हाण (सदस्य, युवा विकास मंच), अभिजीत उकारडे (अध्यक्ष, लोकविकास संघ), तसेच उद्योजक कल्पेश विटकर, धर्मेंद्र शिंदे, शेखर लगड आणि भूषण गवळी उपस्थित होते.